Kryeministri britanik, Rishi Sunak tha se Britania e Madhe nuk do të hezitonte të nisë sulme të mëtejshme ajrore kundër rebelëve Houthi të mbështetur nga Irani, nëse sulmet ndaj anijeve vazhdojnë. Avionët e Forcave Ajrore Mbretërore (RAF) morën pjesë në një valë të dytë të aksionit të përbashkët SHBA-BM kundër rebelëve me qendër në Jemen dje në mbrëmje, pas vazhdimit të sulmeve ndaj anijeve në Detin e Kuq dhe Gjirin e Adenit. “Nuk po kërkojmë konfrontim. Ne u bëjmë thirrje Houthi të ndalojnë këto sulme të paligjshme dhe të papranueshme”, tha Sunak. “Por, nëse është e nevojshme, BM-ja nuk do të hezitojë të përgjigjet sërish me vetëmbrojtje”, shtoi ai. “Ne nuk mund të qëndrojmë duarkryq dhe të lejojmë që këto sulme të mos kundërshtohen. Mosveprimi është gjithashtu një zgjedhje”, tha kryeministri britanik. Katër avionë “RAF Typhoon” dhe një cisternë Voyager u përfshinë në aksionin e fundit. Disa objektiva u goditën në dy objekte ushtarake në veri të kryeqytetit të Jemenit, Sanaa. Sunak tha se sulmet kishin për qëllim vendet që Houthi përdor për të mbështetur sulmet ndaj anijeve dhe se të gjitha objektivat e shënjestruara ishin shkatërruar.
