Ekonomia shënoi rritje me 2.23 % në tremujorin e dytë

Produkti i Brendshëm Bruto (PBB) në tremujorin e dytë të vitit 2022 vlerësohet me rritje prej 2.23%, kundrejt tremujorit të dytë të vitit 2021. INSTAT publikoi sot raportin mbi Produktin e Brendshëm Bruto, sipas të cilit PBB-ja në tremujorin e dytë të këtij viti shënoi rënie me 1.16 %, krahasuar me tremujorin paraardhës, e ndikuar nga situata e vështirë globale që është shkaktuar nga çmimet e larta dhe problemet me furnizimin, si rrjedhojë e invazionit ushtarak të Rusisë ndaj Ukrainës. INSTAT bën të ditur se, në rritjen ekonomike prej 2.23 % në tremujorin e dytë të vitit kontribut pozitiv kanë dhënë degët tregti, transport, akomodim dhe shërbim ushqimor me 1.68 %, aktivitetet e pasurive të paluajtshme me 0.65 %, aktivitetet profesionale dhe shërbimet administrative me 0.33 %, bujqësia, pyjet dhe peshkimi me 0.31 %, aktivitetet financiare dhe të sigurimit me 0.26 %, ndërsa informacioni dhe komunikacioni me 0.06 %. Negativisht kontribuuan aktiviteti i ndërtimit me 0.49 %, industria, energjia dhe uji me 0.46 %, administrata publike, arsimi dhe shëndetësia me 0.32 %, arte, argëtim, çlodhje dhe aktivitete të tjera shërbimi me 0.09 %. Sipas raportit të INSTAT-it, taksat neto mbi produktet kontribuuan pozitivisht me 0.29 %. Në tremujorin e dytë të vitit 2022, krahasuar me tremujorin e dytë të vitit 2021 degët kryesore që kontribuuan janë aktiviteti i bujqësisë, pyjeve dhe peshkimit, i cili pati një rritje me 1.55 %. Grupi i aktiviteteve “tregti, transport, akomodim” dhe “shërbim ushqimor” pati një rritje prej 11.42 %. Grupi i aktiviteteve “informacioni dhe komunikacioni” u shfaq me rritje prej 1.7 %. Aktiviteti financiar dhe i sigurimit ka shënuar një rritje prej 13.20 %, aktiviteti i pasurive të paluajtshme ka shënuar një rritje prej 11.38 %. Grupi i aktiviteteve profesionale dhe i shërbimeve administrative u shfaq me një rritje prej 5.68 %. Ndërsa, taksat neto mbi produktet u rritën me 2.59%. Aktiviteti i industrisë, energjisë dhe ujit pati një rënie me 3.85%, i ndërtimit pati një rënie me 5.26%.http://ata.gov.al/2022/09/30/ekonomia-shenoi-rritje-me-2-23-ne-tremujorin-e-dyte/