Tregu i punës ka treguar zhvillime pozitive edhe gjatë gjysmës së parë të vitit 2022, bëri të ditur Banka e Shqipërisë në Raportin e publikuar sot mbi Stabilitetin Financiar. Sipas BSH-së, punësimi shënoi një rritje prej 3.4% në terma vjetorë, duke bërë që shkalla e papunësisë të bjerë në 11.3% nga 11.9% një vit më parë. Papunësia te të rinjtë (15-29 vjeç) ra në 20.7% ose me 2.6 pikë përqindje, ndaj nivelit të 6-mujorit të parë 2021, duke qëndruar nën mesataren e vlerave të katërvjeçarit të fundit. Rritja e punësimit gjatë periudhës në sektorin e industrisë (8%), në sektorin e bujqësisë (3%) dhe në sektorin e shërbimeve (2%) mbështeti rimëkëmbjen e tregut të punës. Ndërkohë paralelisht rritje ka shënuar edhe paga. Gjatë 3-mujorit të parë të vitit 2022, rritja e pagave vazhdoi të përshpejtohej në 5.8% në terma vjetorë, me kontribut tërësor nga sektori privat (11%). Brenda sektorit privat, pagat u rritën thuajse për të gjithë sektorët, por rritja më e lartë është raportuar nga bizneset e sektorit të shërbimeve.https://ata.gov.al/2022/09/29/bsh-punesimi-shenoi-rritje-prej-3-4/
- Advertisment -