Yield-et e obligacioneve 7-vjeçare u ulën në 6%

Norma e interesit ose yield-et e obligacioneve 7-vjeçare pësuan rënie në ankandin e kësaj jave. Banka e Shqipërisë njoftoi se yield-i i obligacioneve 7-vjeçare shënoi nivelin 6%, ndërkohë që në ankandin e mëparshëm, në dhjetor të vitit të kaluar yield-i mesatar kishte qenë 7.98%. Në ankand shuma totale e kërkuar shënoi 5.3 miliardë lekë, nga 1.5 miliardë lekë që ishte shuma e shpallur e obligacioneve të nxjerra në shitje nga (MFE). Duke parë pjesëmarrjen e lartë dhe yield-et favorshme të kërkuara, MFE e rriti shumën e pranuar të ofertave me 15%, për një vlerë përfundimtare prej rreth 1.73 miliardë lekësh. Në dy muajt e fundit, yield-et e bonove dhe obligacioneve po shënojnë një tendencë të shpejtë në rënie, duke korrigjuar pjesërisht rritjen e fortë që shënuan në periudhën mes muajve gusht dhe nëntor. Kjo dëshmon se tregu paraqitet më i stabilizuar, ndërsa pasiguria e investitorëve, e lidhur me pritjet për inflacionin dhe normat e interesit, është reduktuar ndjeshëm. Yield-et e obligacioneve 7-vjeçare kanë rënë pranë një niveli ku, vetëm dy muaj më parë, ndodheshin yield-et e bonove 12-mujore. ATSH