UNDP në Shqipëri mbështetje bashkive me pajisje kërkim-shpëtimi

10 bashki të Shqipërisë janë përfitueset e drejtpërdrejta nga projekti “Forcimi i Kapaciteteve të Shërbimit Shqiptar të Mbrojtjes nga Zjarri dhe Shpëtimin” – financuar nga qeveria e Polonisë dhe zbatuar nga UNDP në Shqipëri. Falë këtij projekti, janë mundësuar kontenierë me pajisje për kërkim-shpëtim në zonat urbane. Kontejnerët përbëhen nga të gjitha mjetet dhe pajisjet e nevojshme që përdoren nga ekipet e zjarrfikësve gjatë operacionit të kërkim-shpëtimit në zonat ku ka fatkeqësi natyrore, sidomos nga tërmetet dhe ato të shkaktuara nga njeriu. Në këtë kuadër, ambasadorja e Polonisë në Shqipëri Monika Zuchniak-Pazdan, Përfaqësuesja e Përhershme e UNDP-së në Shqipëri Monica Merino dhe drejtoresha e përgjithshme e Shërbimit të Mbrojtjes nga Zjarri dhe Shpëtimin Holta Komino, udhëtuan në 3 prej këtyre bashkive – Durrës, Lezhë dhe Fier – për të dorëzuar kontejnerët e mundësuar nga projekti. Dimensionet e kontejnerëve, organizimi i ndarjeve të brendshme dhe cilësia e mjeteve dhe pajisjeve plotësojnë të gjitha standardet ndërkombëtare. Disa pajisje mund të përdoren nga zjarrfikësit në operacionet e tyre të përditshme të shpëtimit si aksidente automobilistike, zjarre në pyje, kërkim-shpëtim në ndërtesa te rrënuara, puse etj. UNDP ka trajnuar të gjithë zjarrfikësit e çdo bashkie përfituese për përdorimin dhe mirëmbajtjen e kontejnerit dhe mjeteve e pajisjeve. atsh