Kancelari gjerman Olaf Scholz bëri thirrje sot që vendimet për emërimet në postet më të rëndësishme të Bashkimit Evropian të zbatohen pa vonesë, pas marrëveshjes së kësaj jave midis konservatorëve, socialdemokratëve dhe liberalëve.
“Ne nuk mund të përballojmë një bllokim në këto momente të veshtira”, tha Scholz duke iu drejtuar parlamentit gjerman në Berlin.
Ai shtoi se qytetarët e BE-së prisnin veprim të shpejtë për pozicionet.
Tre grupet kryesore kanë rënë dakord që Ursula von der Leyen të vazhdojë detyrën si presidente e Komisionit Evropian për një mandat të dytë dhe që kryeministrja e Estonisë Kaja Kallas të jetë kreu i ri i politikës së jashtme të bllokut.
Ish-kryeministri portugez, António Costa duhet të jetë presidenti i ardhshëm i Këshillit Evropian, i ngarkuar me përgatitjen dhe kryesimin e samiteve të BE-së gjatë dy viteve e gjysmë të ardhshme.
“Për mendimin tim, këto janë emërime dhe vendime të qarta për një të ardhme të mirë evropiane”, tha Scholz në deklaratën e tij të qeverisë në parlamentin gjerman. Emërimet do të miratohen në një samit të BE-së që fillon të enjten, ku miratimi shihet si i sigurt.
Konfirmimi përfundimtar për emërimin e Von der Leyen varet nga sigurimi i shumicës në Parlamentin Evropian, ku një votim është planifikuar të zhvillohet në javën e tretë të korrikut.
Votimi shihet si pengesa më e madhe. Von der Leyen relativisht ka shumë kundërshtarë në parlament. Në vitin 2019, ajo siguroi vetëm nëntë vota – më shumë se minimumi i nevojshëm.
Anëtarët e tjerë të komisionit do të zgjidhen më vonë
