Presidenti rus, Vladimir Putin deklaroi se një konflikt në shkallë të plotë me NATO-n nuk mund të përjashtohet. Deklarata u bë në një konferencë shtypi në Moskë për të shënuar fitoren e tij në zgjedhjet presidenciale, të shoqëruara me akuza për manipulim. ”Në rast të një konflikti të plotë me NATO-n, bota do të ishte vetëm një hap larg një lufte të tretë botërore”, citohet të ketë thënë Putin. “Unë mendoj se nuk ka gjasa që dikush të jetë i interesuar për këtë”, theksoi ai. Sipas Putin, ushtarë të shumtë nga vendet anëtare të NATO-s janë vendosur tashmë në Ukrainë.
“Ne tashmë e dimë këtë”, tha ai duke shtuar se frëngjishtja dhe anglishtja ishin dëgjuar tashmë në fushën e betejës. “Kjo nuk është asgjë e mirë, veçanërisht për ta, sepse ata po vdesin atje në një numër të madh”, tha Putin, por pa e vërtetuar këtë pretendim. Ukraina është mbrojtur kundër Rusisë me ndihmën perëndimore për më shumë se dy vjet. Komisioni Zgjedhor i Rusisë tha se Putini fitoi një rezultat rekord prej pak më pak se 88% të votave, pasi u numëruan gati një e katërta e tyre. Në zgjedhjet e mëparshme presidenciale në 2018, ai kishte fituar me 76,7% të votave. Asnjë kandidat i vërtetë i opozitës nuk u lejua të kandidojë në votimin treditor.
