Perez fiton Çmimin e madh të Singaporit

Gara e 17-të e këtij sezoni, Çmimit i Madh i Singapori ka parë një makinë “Red Bull” të mbërrijë e para në vijën e finishit, por nuk ka patur festë të madhe për skuadrën austriake. Teksa ishte synuar që Maks Verstapeni ta fitonte këtë garë dhe, bashkë me të të siguronte edhe titullin e kampionit të botës për këtë sezon, nuk ka ndodhur kështu, pasi ka qenë shoku i tij i skuadrës, Serxhio Perez, ai që ka siguruar fitoren, ndërsa holandezi, i cili ishte nisur nga vendi i 8-të, është detyruar të kënaqet me vendin e 7-të në fund të një gare të zhvilluar në pistën e qytetit-shtet, në dritën e prozhektorëve, por që është kushtëzuar nga kapriçot e motit. Madje vetë gara ka nisur me plot një orë vonesë për shkak të reshjeve të dendura të shiut, që përmbytën pistën, dhe, kur ka nisur, ajo ka parë meksikanin e “Red Bull”-it të fitojë duelin në kthesën e parë me pilotin e “Ferrari”-t, Sharl Lëklerk, edhe pse ishte ky i fundit u nis nga vendi i parë. Më pas kreu i renditjes së garës nuk ka ndryshuar, me pilotin tjetër të “Ferrari”-t, Karlos Sainz, që merr që në nisje vendin e 3-të, për të mos e lëshuar deri në fund. Pavarsisht se u përpoq, Lëklerk nuk arriti do ta parakalojë Perezin, i cili vijoi të shkëputej dhe korri fitoren e tij të dytë këtë sezon me më tepër se 7 sekonda epërsi. Sainz plotësoi podiumin, ndërsa drama e vërtetë u zhvillua në pjesën e mesit të garës, aty ku Alonso pësoi defekt në motor në garën e tij të 350-të në Formula 1, kurse Hemiltoni u përplas fillimisht me muret rrethuese duke synuar të parakalonte Sainzin për vendin e 3-të, ndërsa në fund humbi edhe betejën për vendin e 7-të me Verstapenin. Ky i fundit pati gabuar më herët kur kërkoi të parakalonte Norisin dhe, përtej përpjekjeve të tij, nuk shkoi do të më larg se vendi i 7-të, duke shtyrë kështu për një tjetër garë festën e tij për titullin e kampionit të botës. Të gjitha emocionet e kësaj gare erdhën drejtpërdrejt në Rrjetin e Radio-Televizionit Shqiptar.https://sport.rtsh.al/artikull/perez-fiton-cmimin-e-madh-te-singaporit