Tendat e të shpërngulurve nga lufta shtrihen më shumë se 16 kilometra (10 milje) përgjatë bregut të Gazës, duke mbushur plazhin, fushat përreth dhe rrugë të qytetit, shkruan AP.
Familjet hapin gropa për t’i përdorur si tualete. Baballarët kërkojnë ushqim dhe ujë, ndërsa fëmijët kërkojnë nëpër mbeturina dhe ndërtesa të shkatërruara për copa druri apo kartoni, që nënat e tyre t’i djegin për gatim.
Gjatë tre javëve të fundit, ofensiva e Izraelit në Rafah ka detyruar gati një milion palestinezë të largohen nga qyteti jugor i Gazës dhe të shpërndahen në një zonë të gjerë.
Shumica janë zhvendosur tashmë disa herë gjatë luftës gati tetëmujore të Izraelit në Gaza, e cila synon të shkatërrojë Hamasin, por ka shkatërruar territorin dhe ka shkaktuar atë që Kombet e Bashkuara e quajnë gati një zi buke.
Situata është përkeqësuar nga një rënie dramatike e sasisë së ushqimit, karburantit dhe furnizimeve të tjera që mbërrijnë te Kombet e Bashkuara dhe grupe të tjera humanitare për t’ia shpërndarë popullatës.
Palestinezëve u është dashur kryesisht të rivendosin familjet e tyre dhe të gjejnë mjete për të mbijetuar.
”Situata është tragjike. Në çadër janë 20 persona, pa ujë të pastër, pa energji elektrike. Ne nuk kemi asgjë”, theksoi Mohammad Abu Radwan, një mësues në një tendë me gruan e tij, gjashtë fëmijët dhe anëtarët e tjerë të familjes.
”Nuk mund ta shpjegoj se si është të jetosh përmes zhvendosjes së vazhdueshme, humbjes së njerëzve të dashur. E gjithë kjo na shkatërron mendërisht”, theksoi ai.
Abu Radwan u largua nga Rafah menjëherë pasi sulmi izraelit në qytet filloi më 6 maj, pasi bombardimet shkatërruan shtëpinë ku ai po strehohej.
Ai dhe tre familje të tjera paguan 1 000 dollarë për transport për t’i çuar në periferi të Khan Younis, rreth gjashtë kilometra larg.
Pranë çadrës, ata hapën një gropë për tualetin duke varur batanije dhe rroba të vjetra për pak privatësi.
