Organoide të trurit njerëzor po përdoren gjithnjë e më shumë për ndërtimin e biokompjuterëve, një teknologji në zhvillim që synon të kombinojë qelizat biologjike me sistemet kompjuterike.
Kompani bioteknologjike si “Cortical Labs” dhe “FinalSpark” po lidhin qelizat nervore me elektroda për të kryer funksione llogaritëse me konsum shumë të ulët energjie, në fusha që variojnë nga testimi i barnave deri te videolojërat.
Kjo bëhet e ditur në një artikull të publikuar në “Journal of Medical Internet Research” nga gazetari shkencor Simon Spichak.
Edhe pse teknologjia është ende në fazat e hershme, ekspertët besojnë se potenciali i saj është i madh.
Një nga avantazhet kryesore është efikasiteti energjetik, pasi këto sisteme kërkojnë shumë më pak energji sesa inteligjenca artificiale tradicionale dhe rrjetet nervore artificiale.
Një tjetër përdorim premtues është kërkimi farmaceutik.
Platformat e biokompjuterëve mund të përdoren për të testuar efektet e molekulave eksperimentale mbi proceset e të mësuarit të organoideve cerebrale.
Sipas farmakologut dhe toksikologut Thomas Hartung nga “Johns Hopkins University”, kjo teknologji mund të shërbejë si një hap drejt sistemeve neuromorfike, të cilat imitojnë strukturën dhe funksionimin e trurit njerëzor.
Megjithatë, zhvillimi i biokompjuterëve ngre edhe dilema etike.
Studiuesit diskutojnë çështje që lidhen me statusin moral të organoideve cerebrale, mundësinë teorike të shfaqjes së formave të vetëdijes në sistemet më të avancuara, si dhe problemet që lidhen me pëlqimin e donatorëve, pronësinë intelektuale dhe patentat.
Për momentin, pengesa kryesore mbetet paparashikueshmëria e aktivitetit të organoideve, gjë që e bën të vështirë trajnimin dhe kontrollin e tyre.
Megjithatë, me përparimin e kërkimeve në këtë fushë të re, biokompjuterët mund të kenë ndikim të rëndësishëm në të ardhmen e kërkimit biomjekësor dhe të teknologjive të inteligjencës artificiale
