Në Qendrën Kulturore të Serbisë në Paris, është çelur ekspozita “Substrate”, si pjesë e iniciativës Ballkani i Hapur. Kjo ekspozitë është një projekt i përbashkët i tre artistëve nga Shqipëria, Maqedonia e Veriut dhe Serbia. Në ceremoninë e hapjes, ka qenë e pranishme edhe ministrja e Kulturës, Elva Margariti së bashku me homologet e saj; Maja Gojkovic dhe Bisera Kostadinovska Stojchevska. Ministrja Margariti e ka vlerësuar këtë ekspozitë si një dëshmi që arti dhe kultura janë ura komunikimi mes popujve. “Bashkë me homologen serbe dhe atë të Maqedonisë së Veriut, u ndalëm në rëndësinë e artit si faktor paqeje dhe zhvillimi ekonomik, por edhe nevojën për më shumë bashkëpunim dhe lëvizje të lirë për komunitetin krijues”, është shprehur Margariti. Artistët që u bënë bashkë për ngritjen e kësaj ekspozite janë: Driant Zeneli, Kristina Pulejkova dhe Nina Zelkjovic, ndërsa kuratorja e ekspozitës është Claudia Paetzold. Ekspozita “Substrate” studion aspekte të trashëgimisë kulturore dhe natyrore të tre vendeve dhe tregon segmente (substrate) të përbashkëta që përfaqësojnë rajonin e Ballkanit të Hapur. Publiku do të mund ta vizitojë ekspozitën në Paris deri më 12 gusht 2023. atsh
- Advertisment -