Lufta midis Izraelit dhe Hamasit ka vrarë të paktën 29 gazetarë, tha Komiteti për Mbrojtjen e Gazetarëve (CPJ). Lufta gati trejavore midis Izraelit dhe sundimtarëve të Hamasit të Gazës filloi pas një sulmi në shkallë të gjerë ndaj civilëve izraelitë nga militantët e Hamasit më 7 tetor. “Gjatë tre javëve të fundit, CPJ ka dokumentuar periudhën më vdekjeprurëse për gazetarët që mbulojnë konfliktin që kur CPJ filloi gjurmimin në 1992”, tha grupi i të drejtave në një deklaratë. “Ky numër vdekjeprurës shoqërohet me ngacmime, ndalime dhe pengesa të tjera të raportimit në zonat që përfshijnë Bregun Perëndimor dhe Izraelin”, shtoi ai. ”Ndërsa aftësia e gazetarëve për t’u përfshirë në punën e tyre u bë gjithnjë e më e kufizuar, aftësia e publikut për të ditur dhe kuptuar se çfarë po ndodh në këtë konflikt është komprometuar rëndë, me pasoja të mundshme në të gjithë botën”, paralajmëroi CPJ. Ajo ishte “shumë e alarmuar” nga raportet për një ndërprerje të komunikimit në Gaza. “Ndërsa zyrat e lajmeve humbasin kontaktet me ekipet dhe reporterët e tyre në Gaza, të cilët në mënyrë të pavarur po dëshmojnë për të dhënë informacion rreth zhvillimeve dhe viktimave njerëzore të kësaj lufte, bota po humbet një dritare në realitetin e të gjitha palëve të përfshira në këtë konflikt”, tha CPJ-ja. ”Gazetarët janë civilë që duhet të mbrohen dhe synimi i qëllimshëm i gazetarëve ose i infrastrukturës mediatike përbën krime të mundshme lufte”, shtoi CPJ.
