BERZH, për ndërtimin e rrugës Muriqan-Lezhë

Bashkia Shkodër, do të jetë përfituese e investimit që do të ndërmarrë BERZH për ndërtimin e rrugës Muriqan-Lezhë në kuadër të projektit të Korridorit Adriatik Jonian. Në njoftimin e bashkisë së Shkodrës, thuhet se në Ministrinë e Infrastrukturës dhe Energjisë është mbajtur takimi i grupit drejtues të projektit. I pranishëm në takim ishte edhe zëvendëskryetari i bashkisë Shkodër Onid Bejleri, i cili garantoi mbështetjen maksimale nga bashkia për këtë projekt kaq të rëndësishëm. “Me ndërtimin e Autostradës Adriatiko Joninane, Bashkia Shkodër ka një pëfitim të jashtëzakonshëm sa i përket krijimit të lidhjes direkte me vendet e BE, lehtësimit të trafikut në pikat ndërlidhëse me Velipojën dhe Muriqanin, por edhe në rindërtimin e rrugëve të brendshme lidhëse”, vuri në dukje bashkia e Shkodrës. Korridori Adriatiko-Jonian nga Miloti në Fier, do kalojë përmes Thumanës dhe Rrogozhinës dhe më pas duke u lidhur me Shëngjinin, Velipojën, për të kaluar nga ana më panoramike e bregdetit drejt Malit të Zi. Me këtë aks kryhet kapërcim epokal për Shqipërinë turistike dhe ekonominë e këtyre territoreve.