Barazimi, Një mësim për Ballkanin

Ballkani ka qenë të enjten shumë pranë një fitoreje historike ndaj Klujzhit të Rumanisë, por është detyruar të kënaqet me një pikë të vetme në takimin e parë të grupit G të Ligës së Konferencës, që është luajtur në stadiumin “Fadil Vokrri” të Prishtinës, që u mbyll në barazim 1-1. Në fakt, ndeshja e parë e kampiones së Kosovës në fazën e grupeve të veprimtarisë së 3-të të klubeve të kontinentit ka parë skuadrën e trajnerit Ilir Daja, të kalojë në epërsi në minutën e 65-të, por do të ndëshkohet pikërisht në minutën e parë shtesë, kur Klujzhi do të gjejë golin e barazimit. “Ne kishim kontrollin i lojës, gjithçka u kontrollua nga futbollistët tanë, të cilët siç kam thënë janë futbollistë me personalitet, – ka deklaruar Daja pas ndeshjes. – Bëmë lojë nga poshtë, duke e shmangur presionin nga skuadra kundërshtare dhe nuk i lejonim skuadrës kundërshtare asgjë. Na mungoi prezenca e kapitenit Kuç. Me vjen keq që barazuam, por do ta marrim këtë barazim si një mësim për të ardhmen”, – ka përfunduar trajneri nga Tirana. Edhe takimi tjetër i grupit G, midis Sllavias së Pragës dhe Sivasporit, u mbyll në barazim 1-1 dhe të 4 skuadrat kanë nga një pikë pas ndeshjeve të para. Në vijim, skuadra e Dajës do të luajë dy ndeshje në fushë të huaj, ndaj Sllavias në Pragë më 15 shtator, kurse më 6 tetor do të jetë mysafir i Sivasporit.https://sport.rtsh.al/artikull/ilir-daja-barazimi-nje-mesim-per-ballkanin