Bashkimi Evropian mbështet thirrjen e Kombeve të Bashkuara për të lehtësuar situatën humanitare në Gaza, duke përfshirë krijimin e korridoreve humanitare për të ofruar ndihma, njoftoi sot një zëdhënës i Komisionit Evropian.
Zëdhënësi i komisionit shprehu shqetësimin për përkeqësimin e situatës në Gaza për shkak të mungesës së ujit, ushqimit, furnizimeve mjekësore, karburantit dhe energjisë elektrike.
Lidhur me kërkesën e Izraelit për evakuimin e më shumë se një milion njerëz nga Gaza veriore, zëdhënësi i KE-së tha se “civilët duhet të paralajmërohen paraprakisht dhe të alarmohen për operacionet ushtarake të ardhshme, duke i lejuar ata të largohen, dhe kjo është ajo që Izraeli ka bërë”.
“Është gjithashtu e rëndësishme të jemi të qartë se Hamasi nuk duhet t’i ndalojë njerëzit të largohen dhe nuk duhet t’i përdorë ata si mburoja njerëzore. Kjo do të ishte një tjetër mizori nga Hamasi”, tha zëdhënësi.
Presidentja e Komisionit Evropian, Ursula von der Leyen dhe presidentja e Parlamentit Evropian, Roberta Metsola kanë mbërritur sot në Izrael.
