Komisioni i BE,masa të përbashkëta kundër korrupsionit

Komisioni Evropian kërkon të luftojë korrupsionin duke futur dënime minimale të përbashkëta për bllokun dhe duke sanksionuar individë në mbarë botën sipas planeve të reformës. “Korrupsioni është si një kancer. Nëse lihet i shfrenuar, ai do të mbysë shoqërinë tonë demokratike dhe do të shkatërrojë institucionet e saj”, tha zëvendëspresidentja e Komisionit të BE-së, Vera Jourova. “Përkufizimet, periudhat e kufizimit dhe dënimet minimale për veprat e lidhura me korrupsionin, duke përfshirë ryshfetin, shpërdorimin dhe abuzimin e funksioneve, duhet të standardizohen në të gjithë bllokun për të lehtësuar ndjekjen penale përtej kufijve”, thuhet në një njoftim për shtyp. Propozimi parashikon gjithashtu bazën ligjore për të filluar sanksionimin e individëve të përfshirë në akte të rënda korrupsioni në mbarë botën, siç është tashmë rasti me disa shkelje të të drejtave të njeriut. Komisioni vlerëson se korrupsioni i kushton ekonomisë së bllokut të paktën 120 miliardë euro (132.5 miliardë dollarë) në vit. Propozimet e komisionit nuk janë të lidhura me skandalin e korrupsionit që tronditi Parlamentin Evropian në fund të vitit të kaluar dhe çoi në arrestimin e pesë ligjvënësve të BE-së. Në statistikat globale, anëtarët e BE-së, si Danimarka dhe Finlanda janë renditur si vendet më pak të korruptuara në një indeks të publikuar nga organizata mbikëqyrëse “Transparency International” në fillim të këtij viti. “Pothuajse shtatë në 10 evropianë besojnë se korrupsioni është i përhapur në vendin e tyre”, sipas një sondazhi të BE-së të botuar vitin e kaluar. Johansson paralajmëroi se shumë pak raste në BE ndiqen penalisht dhe më pak çojnë në dënime, duke e quajtur korrupsionin një problem të madh. atsh