Presidentja e Komisionit Evropian, Ursula von der Leyen paralajmëroi sot se vendosja e një preference “Made in Europe” në kontratat publike është “një vijë e hollë për t’u ndjekur”, ndërsa liderët e Bashkimit Evropian pritet të diskutojnë gjerësisht çështjen në një samit informal.
Duke folur në seancën plenare në Strasbourg, Von der Leyen tha se në sektorët strategjikë, një preferencë evropiane mund të shërbejë si instrument i domosdoshëm për forcimin e bazës prodhuese të BE-së.
“Besoj se në sektorët strategjikë, preferenca evropiane është një instrument i nevojshëm që do të ndihmojë në forcimin e prodhimit tonë të brendshëm. Mund të krijojë tregje udhëheqëse dhe të mbështesë zgjerimin e kapaciteteve prodhuese evropiane”, u shpreh ajo.
Megjithatë, shefja e KE-së theksoi se çdo hap duhet bërë me kujdes.
“Dua të jem e qartë – është një vijë e hollë për t’u ndjekur. Nuk ka një formulë të vetme. Prandaj çdo propozim duhet të mbështetet në analiza të forta ekonomike dhe të jetë në përputhje me detyrimet tona ndërkombëtare”, shtoi Von der Leyen.
Deklarata vjen pak orë para fillimit të samitit ku pritet debat mbi propozimet për të rritur konkurrueshmërinë e industrisë evropiane në kushtet e presionit të shtuar global.
