Pas zjarreve shkatërruese në Greqi, pjesa më e madhe e fokusit mbeti në verilindje të vendit, në rajonin e Evros pranë kufirit me Turqinë, ku një zjarr pyjor i shkaktuar nga nxehtësia u ndez tetë ditë më parë dhe u përhap me shpejtësi. “Rreth 74,000 hektarë tokë janë djegur në zonë, 13,000 prej tyre vetëm në parkun kombëtar Dadia”, raportojnë mediet greke. Komisioni Evropian e përshkroi atë si zjarrin më të madh të vetëm në historinë e Bashkimit Evropian. Të martën, në Evros u gjetën 18 trupa të djegur, që besohet të jenë emigrantë. Dy trupa të tjerë u zbuluan të premten. Zjarri dëmtoi gjithashtu ekosistemin natyror. Ornitologët paralajmëruan se pylli i vjetër me pisha ofronte vende perfekte foleje për zogjtë grabitqarë dhe shkaba, shumë prej të cilëve tani kanë rënë viktimë e zjarrit. Disa zjarre janë djegur prej disa ditësh në të gjithë Greqinë, por stuhitë mund të përmirësojnë situatën. Parashikohej të binte shi gjatë fundjavës në Greqinë qendrore, në qytetin port verior të Selanikut dhe madje edhe në Athinë. Megjithatë, rrufeja ndezi flakë të reja sot në mëngjes, këtë herë në qytetin bregdetar të Varit pranë Athinës. ATSH
