Ukraina i bën presion SHBA, për garanci sigurie

Kievi ka vendosur të fillojë bisedimet me Uashingtonin në ditët në vijim për të marrë garancitë e sigurisë që do të ishin në fuqi përderisa pranimi i tij i planifikuar në NATO po mbetet pezull, deklaroi kreu i zyrës së presidentit ukrainas, Volodymyr Zelensky. Andriy Yermak tha në Telegram se qëllimi i bisedimeve ishte marrja e angazhimeve konkrete dhe afatgjata nga SHBA për të ndihmuar Ukrainën të fitojë luftën kundër Rusisë dhe për të parandaluar agresionin e ardhshëm nga Moska. G7-a kishte premtuar mbrojtje afatgjatë ndaj Ukrainës në samitin e NATO-s në Vilnius. Yermak tha se bisedimet me SHBA do të silleshin rreth marrjes së angazhimeve dypalëshe të sigurisë për Ukrainën ndërsa vendi pret të bashkohet me NATO-n, duke shtuar se ky do të ishte vetëm hapi i parë. Ai tha se bisedimet duhet të përfshijnë mbështetjen dhe financimin e mbrojtjes si dhe sanksione të mëtejshme kundër Rusisë. ”Ukraina po punon gjithashtu për marrëveshje dypalëshe me aleatët e tjerë të saj”, tha ai. Shefi i zyrës së Zelensky konfirmoi gjithashtu se një samit i përfaqësuesve ndërkombëtarë në Arabinë Saudite do të zhvillohet javën e ardhshme. Takimi do të fokusohet në zbatimin e “formulës së paqes” të Zelenskit për një zgjidhje të konfliktit. Thelbi i formulës është kërkesa për tërheqjen e trupave ruse nga Ukraina. Rusia nuk është e përfshirë në dhënien e garancive të sigurisë dhe as në takimin në Arabinë Saudite. ”Wall Street Journal” ka raportuar se Arabia Saudite do të presë bisedimet e paqes me përfaqësues nga 30 vende në Xhedah, më 5 dhe 6 gusht. atsh