Vendet e trashëgimisë kulturore në vendin tonë çdo vit e më shumë po tërheqin vizitorë të shumtë vendas dhe të huaj, pasi këto vende ngjallin interes të lartë për të mësuar më shumë rreth vlerës së tyre dhe historisë.
Ministrja e Kulturës, Elva Margariti, ka bërë një bilanc të gjashtëmujorit të parë të vitit, sa i përket të ardhurave nga vizitorët në objektet e trashëgimisë kulturore.
Ajo thekson se, bashkë me rritjen e numrit të vizitorëve janë rritur edhe të ardhurat nga shitja e biletave në objektet e trashëgimisë.
Në 6-mujorin e parë të këtij viti, të ardhurat nga vizitorët në objekte të trashëgimisë kulturore, janë dy herë më shumë se në vitin 2021.
Nga shifrat e publikuara nga Ministria e Kulturës në 6-mujorin e parë të këtij viti, janë mbledhur nga shitja e biletave në këto objekte 60,625,620 lekë, ndërsa në po të njëjtën periudhë të 2021 të ardhurat janë 29,605,310 lekë. Në 6-mujorin e parë të vitit 2020 të ardhurat ishin 9,878,530 lekë.
Këtë vit është shënuar një fluks në rritje i vizitorëve vendas dhe të huaj në sitet e trashëgimisë kulturore shqiptare, në të cilat nuk ka munguar kujdesi përmes investimeve dhe restaurimeve.
Në 6-mujorin e parë të këtij viti, numri i vizitorëve në vendet e trashëgimisë kulturore ka qenë 213,519 ndërsa në vitin 2021 ka qenë pothuaj gjysma e tyre, 106,534 vizitorë.
Këto atraksione janë më të preferuarit gjatë kësaj periudhe për turistë e huaj pasi ata shfaqin interes për të parë nga afër objektet dhe për të mësuar më shumë rreth historisë dhe vlerave që kanë këto vende.
