Tirana, gati për UEFA FUTSAL CHAMPIONS LEAGUE

Tirana për herë të dytë do të jetë organizatori i UEFA FUTSAL CHAMPIONS LEAGUE, që nga 24 deri më 27 gusht do të zhvillohet në sallën olimpike “Feti Borova”. Një aktivitet i cili do të vijë drejtpërsëdrejti në rrjetin e Radio Televizionit Shqiptar, ashtu sikurse ka ndodhur dhe vitin e kaluar. Trajneri i Tiranës në futbollin e sallës, Artur Agoni, tregon se cila do të jetë risia e këtij aktiviteti ndërkombëtar në kryeqytet. “Nuk besoj – thotë Angoni – se do të ketë ndonjë ndryshim të madh. Përderisa UEFA e sjell për të dytin vit radhazi këtë aktivitet te ne do të thotë që beson”. Por si vjen Tirana në këtë aktivitet dhe cilat janë objektivat? “Skuadra është pothuajse e njëjta duke shpresuar që të mos kemi më probleme pandemie, teksa vitin e kaluar mbetëm pa portier. Kuptohet objektivi është kalimi i grupit”. Apoel i Qipros, Belfasti i Irlandës së Veriut dhe Diferdonzh i Luksemburgut kundërshtarët e bardhebluve. “Kundërshtarët janë të barabartë. Me Diferdonzh dhe Belfast kemi luajtur dhe kemi fituar. I vetmi ekip që nuk njohim është Apoel. Megjithatë shpresojmë dhe besojmë të kalojmë grupin”. Ndërkohë që një skuadër të jetë e përgatitur mirë për aktivitetin ndërkombëtar, Angoni thotë se do të ketë kampionat më të gjerë e më të shtrirë në muaj. “Ne sapo kemi dalë nga një mbledhje në Federatën Shqiptare të Futbollit dhe mendohet një kampionat me më shumë skuadra dhe i shtrirë në muaj, sepse kështu do të ndihmohet dhe rritja e nivelit të futbollit të sallës”.https://sport.rtsh.al/artikull/tirana-gati-per-uefa-futsal-champions-league