Shën Mëria e Kosinës, destinacion turistik 

Besimtarët e krishterë kremtojnë sot festën e Shën Mërisë, apo siç njihet ndryshe “fjetja e Hyjlindëses”. Bashkia Përmet, duke pasur prioritet trashëgiminë kulturore dhe turizmin kulturor, ka kujtuar me rastin e kësaj feste, një nga destinacionet më të rëndësishme të pelegrinazhit të ortodoksëve, kishën e Shën Mërisë së Kosinës. Shën Mëria e Kosinës, është një destinacion i rijetësuar, një thesar kulti dhe gjithashtu edhe itinerar turistik. E vendosur mbi një kodër, kisha “Fjetja e Shën Mërisë”, 558-vjeçare, e cilësuar si kisha e dytë më e vjetër në Ballkan, sot ka pritur pelegrinët, që festojnë ditën e “Shën Mërisë së Kosinës”. Në vitin 2018 ka përfunduar restaurimi nga brenda dhe jashtë i kishës, një hap i ndërmarrë për zhvillimin e kësaj zone. Fshati Kosinë është pjesë e 100 fshatrave turistikë e një ndër destinacionet turistike më të kërkuara në Përmet. Kisha Ortodokse Autoqefale e Shqipërisë, njoftoi se Fjetja e Hyjlindëses së Tërëshenjtë u kremtua në të gjithë vendin, në kishat e Kryepiskopatës dhe në Mitropolitë. Kjo është një nga të kremtet më të ndjera e të festuara historikisht, gjë që e dëshmon edhe numri i madh i kishave e manastireve në vendin tonë dhe në gjithë botën ortodokse, kushtuar kësaj ngjarjeje. Në këtë festë ato kthehen në vende pelegrinazhi dhe veprimtarish të shumta.