Sevasti Qiriazi, nismëtarja e shkollës së vashave

Atdhetarja dhe nismëtarja e organizimit të arsimit shqip për femra, Sevasti Dako Qiriazi u nda nga jeta më 30 gusht 1949. Ishte gruaja e parë shqiptare që studioi në “Robert College” në Stamboll. Pas studimeve, në vitin 1891, ajo u kthye në Shqipëri dhe ndihmoi në ngritjen e shkollës së vashave në Korçë. Së bashku me motrën e saj Parashqevi Qiriazin, ishin mësueset e para të kësaj shkolle. Ka hartuar dhe redaktuar një sërë tekstesh shkollore bashkë me të shoqin, Kristo Dakon. Ka qenë pjesëmarrëse në të dy kongreset e rëndësishme që hodhën themelet e alfabetit dhe arsimit shqiptar, Kongresin e Manastirit dhe atë të Elbasanit. Sevasti Qiriazi ka bashkëpunuar ngushtë me grupet patriotike shqiptare që gjendeshin jashtë vendit dhe më së shumti me Ismail Qemalin. Në vitin 1920, u kthye në Shqipëri dhe hapi institutin femëror ‘‘Kyrias’’. Drejtoria e Përgjithshme e Arkivave publikon foton e portretit të saj si dhe një pjesë nga drama “Foleja Kombëtare” e cila gjendet në AQSH, vepër e institutit “Kyrias”.https://ata.gov.al/2022/08/30/sevasti-qiriazi-nismetarja-e-shkolles-se-vashave/