Salla e Koncerteve në Universitetin e Arteve

Salla monumentale e Koncerteve në Universitetin e Arteve shumë shpejt do të jetë gati për të pritur studentë, artistë dhe spektatorë. Lajmi u bë i ditur nga ministrja e Kulturës, Elva Margariti, në një postim në rrjetet sociale në kuadër të “Ditëve të trashëgimisë” . Margariti tha se restaurimi i sallës monumentale të koncerteve në Universitetin e Arteve ishte një sfidë dhe një premtim. “Në bashkëpunim me TAP – Shqipërisë po i rikthejmë dinjitetin e humbur dhe shumë shpejt do të jetë gati për të pritur studentë, artistë e spektatorë”, theksoi Margariti. Kjo sallë po restaurohet sipas standardeve bashkëkohore falë një financimi serioz të qeverisë shqiptare në bashkëpunim me TAP Shqipëri. Përgjatë viteve, këto ambiente mbresëlënëse kanë pritur një sërë aktivitetesh kulturore kombëtare dhe ndërkombëtare, nga shfaqe teatrale në koncerte. Salla e rinovuar e koncerteve në Universitetin e Arteve të Tiranës, do të sjellë përfitime jo vetëm për qytetarët e Tiranës, por edhe për të gjithë komunitetin kulturor shqiptar. TAP financon 1,7 milionë euro për restaurimin e Sallës së Koncerteve në UAT, një nga investimet më të mëdha sociale dhe mjedisore të TAP-it në Shqipëri, investim ky që i shtohet një liste të gjatë investimesh në arsim, infrastrukturë, kulturë dhe mjedis.http://ata.gov.al/2022/09/05/margariti-salla-e-koncerteve-ne-universitetin-e-arteve-shume-shpejt-gati/