Negociatat, në Bruksel për kapitullin 32

Shqipëria tashmë ka hyrë në një proces të rëndësishëm, pas hapjes së negociatave drejt anëtarësimit në Bashkimin Evropian. Komisioni Evropian dhe delegacioni shqiptar i kryesuar nga zëvendësministrja e Financave dhe Ekonomisë, Adela Xhemali, zhvilluan në 19-20 shtator në Bruksel, takimet shpjeguese të kapitullit 32 “kontrolli financiar” dhe “kriteri ekonomik”. Gjatë takimeve u theksua fakti se është thelbësore përgatitja dhe përafrimi i legjislacionit të Shqipërisë me atë të BE. Ky takim ishte si një “agjendë udhërrëfyese” për takimet bilaterale të dy palëve, që do të zhvillohen brenda këtij viti. Si negociator i kapitullit 32, ” kontrolli financiar”, zëvendësministrja e Financave dhe Ekonomisë, Adela Xhemali, theksoi se është e madhe përgjegjësia që ka pala shqiptare për të përmbushur me rigorozitet të gjitha kriteret e përcaktuara për anëtarësimin e Shqipërisë në BE. “Nëpërmjet hartimit të Planit Kombëtar të Integrimit Europian nga MFE janë marrë masa konkrete në disa drejtime si, miratimi i kuadrit dhe standardeve të pranuara ndërkombëtarisht, përthithja e praktikave më të mira të BE-së në fushën e kontrollit të brendshëm financiar publik, bazuar në parimin e përgjegjësisë së decentralizuar të llogaridhënies menaxheriale, si dhe vënia në funksionim e një organi të auditimit të jashtëm të pavarur nga ana institucionale, operacionale dhe financiare, që zbaton mandatin e tij të auditimit në përputhje me standardet e Organizatës Ndërkombëtare të Institucioneve Supreme të Auditimit”, tha Xhemali. Gjithashtu mbrojtja e interesave financiare të BE-së kundër mashtrimeve në menaxhimin e fondeve të BE-së dhe mbrojtja e euros kundër falsifikimit, është një nga angazhimet e Grupit të Punës Ndërinstitucional për Integrimin Evropian për Kapitullin 32. Ndërkohë që për “kriterin ekonomik” u fokusuan mbi rritjen e aftësive konkurruese, klimën e biznesit dhe tregun e punës. Nëpërmjet “kriterit ekonomik” kërkohet një ekonomi tregu funksionale, si dhe rritje e kapacitetit për të përballuar konkurrencën dhe forcat e tregut brenda Bashkimit Evropian. Për të mundësuar këtë duhet të përmbushen kushtet si, stabiliteti makroekonomik, funksionimi efikas i tregjeve të produkteve përmes përmirësimit të mjedisit të biznesit, eliminim i barrierave hyrëse/dalëse në treg, vendosje e një sistemi ligjor mirëfunksional, zhvillimi i tregut financiar dhe lehtësimi i aksesit në financa, si dhe marrja e masave të nevojshme për të arritur funksionimin normal të tregut të punës. Në procesin e Integrimit Europian, Ministria e Financave dhe Ekonomisë drejton 13 kapituj dhe 2 kapituj me bashkënegocim.https://ata.gov.al/2022/09/21/negociatat-mfe-nis-takimet-shpjeguese-ne-bruksel-per-kapitullin-32/