Organizata britanike për mbrojtjen e kafshëve RSPCA ka bërë të ditur se më shumë se 250 qen të tipit poodle-cross janë zbuluar duke jetuar në një shtëpi të vetme në Britaninë e Madhe, në kushte që i cilësoi si alarmante.
Sipas RSPCA, numri i kafshëve dhe kushtet e jetesës kishin dalë “shpejt jashtë kontrollit”, për shkak të rrethanave të vështira familjare.
Një fotografi e publikuar nga një prej shpëtuesve, ku shihen dhjetëra qen të grumbulluar në një dhomë ndenjeje, u vu në dyshim në rrjetet sociale si e gjeneruar nga inteligjenca artificiale.
Por, organizata theksoi se imazhi është real dhe pasqyron “realitetin tronditës” të rasteve me shumë kafshë.
RSPCA njoftoi se rastet e tilla – ku në një adresë mbahen të paktën 10 kafshë – janë rritur me 70% në Angli dhe Uells që nga viti 2021.
Vetëm gjatë vitit të fundit, organizata ka trajtuar rreth 4,200 incidente të këtij lloji.
Një pjesë e qenve u dërgua në “Qendrën e Kafshëve Radcliffe” në Notingham, ku stafi raportoi se kafshët kishin qime shumë të ngatërruara dhe probleme të lëkurës.
Disa prej tyre ishin aq të frikësuar, saqë duhej të transportoheshin me krahë nga kafazet deri në hapësirat e gjelbra.
Drejtuesja e RSPCA, Jo Hirst, deklaroi se situata të tilla po bëhen gjithnjë e më të shpeshta, me raste që përfshijnë 10, 20 apo edhe mbi 100 kafshë.
Ajo theksoi se, edhe pse publiku shpesh dyshon në autenticitetin e pamjeve, këto janë raste reale që tregojnë se si pronarë edhe me qëllime të mira mund të mbingarkohen dhe të humbasin kontrollin, sidomos kur shumimi i pakontrolluar përkeqëson situatën.
Organizata sqaroi se nuk mund të japë detaje të mëtejshme për pronarët, por theksoi se ata vetë kishin kërkuar ndihmë pasi ndiheshin të mbingarkuar.
Për shkak të natyrës së ndjeshme dhe vulnerabël të rastit, nuk është ndërmarrë ndjekje penale.
Sipas RSPCA, raste të tilla mund të lidhen me probleme të shëndetit mendor, krizën e kostos së jetesës ose praktika të dobëta të mbarështimit.
Qentë poodle-cross, të njohur edhe si “doodles”, janë bërë shumë të njohur vitet e fundit dhe renditen ndër tre llojet më të përhapura, sipas një sondazhi të vitit 2025 nga “Dogs Trust”.
Nga 250 qentë e shpëtuar, 87 u morën në kujdes nga RSPCA, ndërsa pjesa tjetër u transferua te “Dogs Trust” – një organizatë bamirëse në Britaninë e Madhe, që merret me mbrojtjen dhe mirëqenien e qenve.
Kafshët janë shpërndarë në qendra të ndryshme për rehabilitim dhe adoptim, përfshirë Hertfordshire, Surrey, Norfolk dhe Nottinghamshire.
Dy prej qenve, Stevie dhe Sandy, janë aktualisht në pritje për adoptim në qendrën Southridge.
Stevie është i verbër dhe i shurdhër, ndaj duhet të adoptohet së bashku me Sandy, e cila shërben si guida e saj
