Evropa është në një udhëkryq, tha sot presidenti francez Emmanuel Macron gjatë një vizite në qytetin gjerman, Dresden. Macron bëri thirrje për një Evropë të fortë dhe sovrane. “Evropa është një histori paqeje, prosperiteti dhe demokracie, por e gjithë kjo është nën kërcënim nëse Evropa nuk vepron”, tha Macron. Duke folur për pushtimin rus në Ukrainë, Macron tha se Evropa duhet të formulojë politikën e saj të pavarur të sigurisë dhe mbrojtjes. Gjithashtu, presidenti francez u bëri thirrje evropianëve që të veprojnë si aleatë brenda NATO-s. “Evropa duhet të jetë më sovrane dhe më e pavarur në lidhje me konkurrencën nga Kina dhe Shtetet e Bashkuara të Amerikës”, tha Macron. “Evropa ka nevojë për një model rritjeje për brezat e ardhshëm”, tha presidenti francez, duke theksuar nevojën për të nxitur rritjen ekonomike dhe mbrojtjen e klimës në të njëjtën masë.
