Kredia hipotekore, BSH: Normat e interesit u rritën në 4.0%

Normat e interesit për kreditë në lekë të individëve, në 3-mujorin e dytë të vitit, kanë filluar të tejçojnë rritjen e normës bazë të interesit që shënon 1.75% në fillim të muajit gusht 2022. Banka e Shqipërisë bëri të ditur se rritja më e spikatur në këtë tremujor ishte tek kreditë hipotekare, ku interesi i tyre rezultoi 4.0% nga 3.6% që ishte në tremujorin e mëparshëm dhe 3.7% në vitin 2021. “Në një krahasim të shtrirë në kohë, interesi aktual është gjithsesi më i ulët se niveli 4.4% për periudhën 2018-2020. Dy vitet e fundit janë karakterizuar nga një kërkesë e lartë e individëve për kredi hipotekare, e cila është akomoduar nga bankat me kushte të lehtësuara kreditimi. Diferenca e interesit për këto kredi kundrejt yield-it të bonove të thesarit 12-mujore, që shpesh përdoret si normë referencë, ka qëndruar e ulët në gjysmën e pare të këtij viti, në 1.9%, dhe pothuaj aq sa ishte edhe gjatë vitit 2021”, thekson BSH-aj. Sipas BSH-së, tremujori i dytë i këtij viti ka shënuar një rritje edhe në interesin e kredisë konsumatore. Ky interes rezultoi me një nivel mesatar prej 9.3%, nga 9.1% në tremujorin e parë të vitit. Rritja e interesit për këtë lloj kredie ishte më e përmbajtur në këtë tremujor, pas rritjes që shfaqi në tremujorin e parë të vitit. Normat e interesit për kreditë konsumatore janë luhatur rreth nivelit 8.1% për periudhën 2018-2021.http://ata.gov.al/2022/08/16/kredia-hipotekore-bsh-normat-e-interesit-u-rriten-ne-4-0/