Investimet në laboratorë forcuan kontrollet për sigurinë ushqimore

Autoriteti Kombëtar i Ushqimit ka zhvilluar në Vlorë, takimin me drejtorët rajonalë mbi analizën e veprimtarisë vjetore të institucionit. Drejtoresha e AKU-së, Jeta Deda në këtë takim, vuri theksin mbi rëndësinë e ushtrimit të detyrës funksionale të institucionit dhe bëri apel për një vëmendje të shtuar për mbrojtjen e konsumatorit. Deda bëri një pasqyrë të detajuar e kryerjes së detyrave të Autoritetit Kombëtar të Ushqimit duke evidentuar problematikat dhe arritjet, teksa u ndal në detyrat specifike të subjekteve që operojnë në fushën e sigurisë ushqimore për inputet bujqësore dhe rritjen e inspektimeve në procesin e marrjes së mostrave. Drejtoresha e AKU-së, u ndal në disa prej arritjeve më të rëndësishme gjatë periudhës janar –dhjetor 2022. Sipas saj, përmirësimi infrastrukturor dhe funksional në PIK Durrës, (pika doganore) si dhe investimet në laboratorët e kontrollit kanë forcuar dhe rritur kontrollin ushqimor në këtë pikë doganore, që është edhe ndër më të rëndësishmet në vend ku kryhet një fluks i lartë shkëmbimesh tregtare. Gjithashtu tha Deda, ngritja e Bordit të AKU-së, strukturave shkencore dhe rritja e bashkëpunimit ndërinstitucional me IQ, ISUV, ISHP, MAS, PPT dhe DPD ka forcuar shkallën e kontrollit ushqimor. “Gjatë kësaj periudhe është rritur me 145% numri i ngarkesave të eksportuara me një volum prej 40.8% krahasuar me një vit më parë, nëpërmjet implementimit të Open Balkan, dhe paralelisht edhe inspektimi e kontrolli ushqimor”, tha Deda. Drejtoresha e AKU-së solli në vëmendje edhe nismën më të re për rritjen e sigurisë ushqimore që ka të bëjë me fushatën kombëtare për ndërgjegjësimin e nxënësve për ushqime të sigurta. “AKU ka certifikuar mbi 1000 fëmijë e të rinj si ambasadorë të sigurisë ushqimore që janë angazhuar në këtë fushatë”, tha Deda. atsh