Nis “PrizrenFest”, festivali i parë ndërkombëtar i teatrit në ambient të hapur, në Kosovë. “PrizrenFest” do të sjellë trupa të teatrove të ndryshme ndërkombëtare, deri në datën 4 gusht. Pjesëmarrësit do të jenë nga Shqipëria, Bosnja-Hercegovina, Turqia, Italia, Rumania, Maqedonia e Veriut dhe Franca. Festivali ndërkombëtar i Teatrit “PrizrenFest”, me një program të veçantë, do të mbahet në vendet më të bukura të trashëgimisë së Prizrenit si: Kino Lumbardhi, Kalaja e Prizrenit, Lidhja e Prizrenit, Kino Plato dhe Sheshi i lidhjes së Prizrenit.
Natën e parë nisi në KINO LUMBARDHI. Nën brohoritjet dhe duartrokitjet e gjata të publikut u prezantua Teatri Kombëtar i Sarajevës me shfaqjen “To nikad nigdje nije bilo”(kjo kurrë e askund s’ka ndodh) nga regjisori i njohur Dino Mustafic. Me këtë shfaqje, Teatri Kombëtar i Sarajevës, kremton 100-vjetorin e ekzistencës së tij dhe kujton shumë nga ditët e tij të lumtura dhe jo të lumtura, njerëzit dhe fatet e panumërta që e shënuan gjatë gjithë asaj kohe.
Dhe kujton atë që kurrë, askund, nuk ndodhi. Në këtë event artistik, Shqipëria do të përfaqësohet nga teatri i Durrësit “Aleksandër Moisiu”, me një ndër komeditë më të bukura të Shekspirit, përshtatur dhe vënë në skenë nga Driada Dervishi. Trupa e teatrit të Durrësit, do të performojë në datën 4 gusht, në orën 21:00 në sheshin e Lidhjes së Prizrenit.
