Ndërsa liderët botërorë morën pjesë në konferencën e ndryshimeve klimatike COP28 në Dubai, papa Françesku i bëri thirrje sot komunitetit global që të kapërcejë egot kombëtare në luftën për të mbrojtur planetin. “Unë jam me ju, sepse koha është e shkurtër. Unë jam me ju sepse tani më shumë se kurrë, e ardhmja e të gjithëve varet nga e tashmja që ne zgjedhim”, tha kreu i Kishës Katolike, sipas një fjalimi të mbajtur në këtë aktivitet nga sekretari Kardinal i Shtetit, Pietro Parolin. Papës iu desh të anulonte udhëtimin e tij në Emiratet e Bashkuara Arabe në një njoftim të shkurtër për arsye shëndetësore. “Me dëshirën për të prodhuar dhe zotëruar, mjedisi është kthyer në një objekt shfrytëzimi të shfrenuar”, tha papa. “Klima, e turbullt, po na thërret për të ndalur këtë iluzion të plotfuqisë”, shtoi papa Françesku. Bota po përjeton “pozicione të qëndrueshme dhe madje jofleksibile të llogaritura për të mbrojtur të ardhurat dhe interesat e biznesit”, në vend që të përqafojë “rrugën e bashkimit, multilateralizmin”. “Në këtë kontekst, është shqetësuese që ngrohja e planetit shoqërohet me një ftohje të përgjithshme të multilateralizmit, me një mosbesim në rritje ndaj komunitetit ndërkombëtar, tha Papa. “Në të njëjtën kohë, njerëzimi po harxhon energji në luftëra të shumta në Ukrainë, Izrael dhe Palestinë dhe në shumë pjesë të tjera të botës, në konflikte që nuk do t’i zgjidhin problemet, por vetëm i rrisin ato”, theksoi ai. “Në vend të kësaj, bota ka nevojë për një progres së bashku. Le të jetë COP28 një pikë kthese”, tha papa Françesku.
