Britania e Madhe do të ndërtojë objektin e parë të avancuar të karburantit bërthamor në Evropë për të krijuar një zinxhir furnizimi me energji që nuk varet nga Rusia, tha qeveria. Kryeministri britanik, Rishi Sunak tha se ishte thelbësore që Britania e Madhe të ndërtonte një fabrikë të pasurimit të uraniumit për të “larguar duart me gjak të Putinit nga tregu energjetik i Evropës”. Më herët, qeveria njoftoi se do t’i ofronte 196 milionë paund (245 milionë dollarë) kompanisë “Urenco” për të ndërtuar një objekt të pasurimit të uraniumit në Capenhurst, Cheshire, që do të prodhonte lëndë djegëse të uraniumit me pasurim të ulët (HALEU) me vlerësim të lartë deri në vitin 2031 për eksport ose përdorim në vend. Qeveria tha se do të mbështesë 400 vende pune me aftësi të larta, do të fuqizojë stacionet e ardhshme të energjisë bërthamore në Britaninë e Madhe dhe do të sigurojë që vendet e tjera të mos varen nga Rusia për karburant të avancuar bërthamor, një treg që ajo aktualisht dominon. Ministrat thanë se ky projekt ishte pjesë e përpjekjeve për të përmirësuar sigurinë energjetike dhe për të izoluar Moskën nga tregjet e energjisë, mes masave për të ndaluar importet e naftës dhe gazit rus pas pushtimit të paligjshëm të Ukrainës.
