Një grup i gjashtë pengjesh u lirua sot nga militantët në Gaza, ndërsa ndërmjetësit ndërkombëtarë kërkuan një tjetër zgjatje të armëpushimit të përkohshëm midis Izraelit dhe Hamasit. Deri më tani, sipas marrëveshjes së ndërmjetësuar me ndihmën e Katarit, Hamasi ka liruar 81 izraelitë dhe të huaj në këmbim të 180 palestinezëve nga burgjet izraelite. Marrëveshja qetësoi gjithashtu sulmin e egër ushtarak të Izraelit në Rripin e Gazës pas masakrave të 7 tetorit nga Hamasi dhe militantët e tjerë që vranë 1200 persona në Izraelin jugor. Rreth 240 persona të tjerë u dërguan në Gaza si pengje. Armëpushimi që hyri në fuqi të premten ishte thyerja e parë në luftime pas shtatë javësh lufte. Të hënën armëpushimi u zgjat edhe dy ditë. Izraeli tha se është i hapur për të zgjatur ndalimin e luftimeve me 24 orë për çdo 10 pengje të liruar, për një maksimum prej 10 ditësh. “Qeveria izraelite ka marrë tashmë një listë tjetër të pengjeve që Hamasi tha se është gati t’i lirojë sot”, sipas medias izraelite. Pengjet izraelitë do të dorëzohen në këmbim të lirimit të 30 të burgosurve të tjerë palestinezë nga burgjet izraelite. Ndërsa afrohej afati i armëpushimit, zëdhënësi i Hamasit Ghazi Hamad i tha transmetuesit Al Jazeera se bisedimet intensive ishin duke u zhvilluar për të siguruar një zgjatje të dytë. “Dëshirojmë zgjatjen e pauzës, pasi ajo ka mundësuar, para së gjithash, lirimin e pengjeve, kthimin në shtëpi, ribashkimin me familjet e tyre”, tha sekretari amerikan i Shtetit Antony Blinken, në Bruksel.
