BE sanksionon kompani ruse për propagandë të rreme lufte

Vendet e Bashkimit Evropian kanë vendosur sanksione ndaj shtatë individëve dhe pesë subjekteve ruse për një fushatë “manipulimi të informacionit dixhital”. ”Të sanksionuarit ishin përgjegjës për një fushatë që synonte shtrembërimin e informacionit dhe shpërndarjen e propagandës në mbështetje të luftës së agresionit të Rusisë kundër Ukrainës”, tha një deklaratë nga Këshilli Evropian. ”Kjo fushatë, në të cilën kanë marrë pjesë organet qeveritare ose organet e lidhura me shtetin rus, mbështetet në faqet e rreme të internetit që uzurpojnë identitetin e mediave kombëtare dhe faqeve të internetit qeveritare si dhe në llogari të rreme në mediat sociale”, thuhet në deklaratë. “Ky manipulim i koordinuar dhe i synuar i informacionit është pjesë e një fushate më të gjerë hibride nga Rusia kundër BE-së dhe vendeve anëtare”, shtonte ajo. Ata që preken nga masat ndëshkuese përfshijnë oficerë të shërbimit sekret ushtarak rus (GRU), të cilët dyshohet se themeluan një organizatë frontale të quajtur “Instituti i Diasporës Ruse” për fushatën. Ngrirja e aseteve dhe ndalimet e udhëtimit u vendosën për Inforos, një media online, dhe tre prej themeluesve të saj. U sanksionuan edhe shoqata jofitimprurëse ruse ”ANO Dialog” dhe dy kompani ruse të teknologjisë si dhe ”Instituti i Diasporës Ruse”. ”BE-ja tani ka vendosur sanksione ndaj rreth 1 800 personave për minimin ose kërcënimin e integritetit territorial, sovranitetit dhe pavarësisë së Ukrainës”, tha këshilli.