Angelina Jolie ngre padi kundër FBI

Angelina Jolie, ylli i Hollivudit, njëkohësisht ish-bashkëshortja e aktorit të famshëm, Brad Pitt, ka ngritur një padi anonime kundër FBI-së për mosarrestimin e Pitt. Sipas medias amerikane, aktorja është identifikuar si paditësja ”Jane Doe” në një padi kundër FBI-së lidhur me Aktin e Lirisë së Informacionit, ku ajo pyet pse agjencia mbylli një hetim për sulm në vitin 2016 ndaj saj nga ana e Pitt. Jolie pohon se ai kishte sulmuar fizikisht dhe verbalisht atë dhe fëmijët e tyre. Ajo i tha një agjenti federal se Pitt ishte i çmendur dhe hipi në një aeroplan privat nga Franca për në SHBA me të dhe gjashtë fëmijët e tyre duke e akuzuar se kishte goditur disa herë tavanin e avionit duke bërtitur se ajo po shkatërronte familjen. Më pas Pitt do të sulmonte një nga fëmijët e tyre, ajo do ta mbronte atë dhe do të lëndohej në bërryl. Pastaj aktorja e akuzoi atë se i kishte derdhur birrë në një moment tjetër gjatë fluturimit. Gjashtë ditë më vonë, Jolie bëri kërkesë për divorc. Media raportoi se zëvendësprokurori amerikan u takua me agjentin federal në nëntor 2017 dhe vendosi të mos vazhdonte me padinë kundër Pitt. Jolie më pas ngriti një padi anonime kundër FBI-së me shpresën për të marrë dokumente në lidhje me hetimin federal kundër ish-bashkëshortit të saj, i cili mohoi të gjitha akuzat.http://ata.gov.al/2022/08/19/angelina-jolie-ngre-padi-kunder-fbi-se/