Alpet Shqiptare janë tërheqëse jo vetëm për bukurinë që ofron pamja e tyre, por edhe për pasurinë e florës dhe faunës që rritet atje. Administrata Kombëtare e Zonave të Mbrojtura sjell këto imazhe të mrekullueshme nga Parku Kombëtar i Alpeve, habitat i preferuar dhe i qetë për dhinë e egër (Rupicapra rupicapra) dhe për shumë gjallesa të tjera, të cilat pasurojnë këtë zonë plot vlera natyrore. Dhia e egër jeton në Evropë, Azi dhe në Lindjen e Mesme. Gjuetia e saj është e ndaluar, pasi ajo është specie e përfshirë në Listën e Kuqe të Bashkësisë Ndërkombëtare për Ruajtjen e Natyrës (BNRN), e njohur ndryshe edhe si lista e BNRN-së e specieve të rrezikuara. E themeluar në vitin 1964, kjo listë është renditja më e hollësishme në botë e gjendjes së ruajtjes së specieve biologjike duke i radhitur ato sipas kategorive të rrezikshmërisë, duke iu referuar Direktivave të BE-së. Bashkësisë Ndërkombëtare për Ruajtjen e Natyrës (BNRN) është autoriteti kryesor në botë për çështjen e gjendjes së ruajtjes të specieve të gjalla. Shtete dhe organizata të ndryshme nxjerrin një sërë listash të kuqe rajonale, të cilat çmojnë rrezikimin e zhdukjes së specieve përbrenda një njësie administrative të caktuar.
