Seancat dëgjimore në një çështje të ngritur nga Afrika e Jugut që akuzon Izraelin për shkelje të Konventës së OKB-së për Gjenocidin filluan sot në Gjykatën Ndërkombëtare të Drejtësisë (GJND) në Hagë, ndërsa protestuesit pro palestinezë dhe pro izraelitë demonstronin jashtë ambienteve të saj. Afrika e Jugut po kërkon mbrojtje ligjore për palestinezët në procedura të shkurtra dhe kërkon që gjyqtarët të urdhërojnë një armëpushim. Afrika e Jugut akuzon Izraelin për gjenocid për shkak të bombardimeve të tij ndaj popullatës civile në Rripin e Gazës. Kjo është hera e parë që Izraeli përballet me akuza të tilla në GJND. Sipas Ministrisë së Shëndetësisë të drejtuar nga Hamasi në Gaza, numri i palestinezëve të vrarë që nga fillimi i luftës në tetor është rritur në 23 357. Izraeli e kundërshton me vendosmëri akuzën për gjenocid dhe thotë se po mbrohet pasi militantët nga organizata palestineze Hamas dhe grupe të tjera ekstremiste vranë rreth 1 200 njerëz gjatë një sulmi vrasës mbi Izraelin më 7 tetor. Ai do të prezantojë nesër qëndrimin e vet. Mbështetësit e palestinezëve u mblodhën para Pallatit të Paqes në Hagë, selia e gjykatës. Edhe disa dhjetëra mbështetës të Izraelit marshuan gjithashtu drejt gjykatës për një demonstratë. Afrika e Jugut e ngriti çështjen në fund të dhjetorit sepse pa një jehonë, sipas saj, të aparteidit nga historia e saj në veprimet e Izraelit. Komuniteti ndërkombëtar është i ndarë nëse çështja duhet të gjykohet. GJND-ja është organi më i lartë gjyqësor i OKB-së, por nuk ka fuqi zbatuese
