Miratohet dëmshpërblimi për 9 ish të dënuar politikë të regjimit komunist

Botohet në fletoren zyrtare vendimi i qeverisë, i cili përcakton dëmshpërblimin financiarë për 9-të ish të dënuar politikë të regjimit komunist Në vendimin e publikuar në fletoren zyrtare, vihet re se vendimi përmban tri pika. Në pikën e parë është miratuar dëmshpërblimi financiar për disa ish-të dënuar politikë të dënuar me burgim, izolim në hetuesi, izolim në institucion mjekësor apo mjekësor psikiatrik, sipas listës me shtatë emra të aneksit A. Në pikën e dytë, përcaktohet dëmshpërblimi financiar për ish-të dënuar politikë të dënuar me dënim kapital ose të ekzekutuar pa gjyq, sipas listës me dy emra të përcaktuar në aneksin B. Në vendim saktësohet se, dëmshpërblimi për ish-të dënuarit politikë bëhet me këste. Shuma e përllogaritur përballohet nga buxheti i Ministrisë së Shëndetësisë dhe Mbrojtjes Sociale, i planifikuar për këtë qëllim. Shuma transferohet nga Ministria e Shëndetësisë dhe Mbrojtjes Sociale në bankën e nivelit të dytë nëpërmjet thesarit. Pagesa e dëmshpërblimit për secilin përfitues urdhërohet nga Ministria e Financave dhe Ekonomisë në llogaritë e tyre personale, të hapura në bankat e nivelit të dytë. Në vendimin e publikuar në fletoren zyrtare janë zbardhur dhe emrat e përfituesve.