AZHBR nis financimin për 6 masat mbështetëse

Agjencia për Zhvillimin Bujqësor dhe Rural, ka nisur në të gjithë vendin, financimin e pjesshëm të fermerëve të shpallur përfitues të Skemës Kombëtare 2023, për 6 masat mbështetëse. AZHBR, ka publikuar në faqen zyrtare të saj listën e 1656 fermerëve përfitues, sipas masave mbështetëse, për të cilët është disbursuar në llogaritë e tyre bankare mbështetja financiare, ndërkohë që vijon puna me kryerjen e pagesave të tjera. Sipas AZHBR-së, në vijim të procesit të administrimit të fondit të programit për bujqësinë dhe zhvillimin rural, në zbatim të vendimit “Për Kriteret, Procedurat dhe Mënyrën e Administrimit të Fondit të Programit për Bujqësinë dhe Zhvillimin Rural”, ka filluar financimin pjesor për masat mbështetëse 1-6, që përfshijnë sektorët (Tufa bazë e matrikulluar (gjedhë); Tufa bazë e matrikulluar (të imta); Fara, fidanë dhe inpute të tjera; Bletari; Fermat organike; Certifikimi Global Gap. Skema Kombëtare 2023 do të financojë në total 9 masa. Konkretisht, në blegtori do të mbështeten fermat me jo më pak se 10 (dhjetë) krerë lopë, në vlerën deri në 10 mijë) lekë/krerë, por jo më shumë se 500 mijë lekë për subjekt. Tek të imtat, do të mbështeten fermat me jo më pak se 100 krerë dele dhe/ose dhi, në vlerën deri në 1200 (lekë/krerë, por jo më shumë se 360 mijë lekë për subjekt. Bletaria do të mbështetet 1 mijë lekë për zgjua, për ferma me jo më pak se 50 zgjoje. Po ashtu, fondi do të përdoret për mbështetje për fara/fidanë dhe inpute të tjera në vlerën deri në 200 000 lekë për ha për sezon për kultivimin e perimeve, rrushit për tavolinë në serra dhe/ose luleshtrydhe në tunele plastike me sipërfaqe të mbjellë jo më pak se 1 ha; Fermat organike për 100 deri në 200 mijë lekë për fermë të certifikuar. Fondi do të mbështesë gjithashtu certifikimin Global GAP, rinovimin e infrastrukturës së anijeve të peshimit; ndërtimin e tregjeve bujqësore si dhe punimet e mekanizuara në bujqësi. Ndër kriteret kryesore që duhet të përmbushin fermerët janë: Aplikanti duhet të jetë shtetas shqiptar ose person juridik ku të paktën njëri prej ortakëve/aksionerëve është shtetas shqiptar. Përfitues mund të jenë fermerë individualë, grup fermerësh, subjekte me status fizik, juridik, SHBB dhe GVV. ATSH