​“Ramë Lahaj International Opera Festival” 

Festivali më i madh operistik në vend, “Ramë Lahaj International Opera Festival”, ka nisur edicionin e tretë me radhë. Festivali i cili mban emrin e tenorit të mirënjohur kosovar, Ramë Lahaj, fal eksperiencës dhe namit të tij në komunitetin botëror të operës, sjellë para publikut shqiptar emra të mirënjohur të muzikës operistike si Alessandro Safina, Yulia Suleimanova dhe Massimo Cavalletti, duke vazhduar misionin e vet në pasurimin e jetës kulturore dhe promovimit të Kosovës në skenën ndërkombëtare. Tenori Ramë Lahaj në një konferencë për media, është shprehur se ideja e festivalit është për të promovuar çdogjë që ka të bëjë me kulturën, pasi theksoi se ka parë shumë vepra të bukura në Kosovë, por sipas tij, mundësia për t’u ekspozuar nuk është aq e madhe. Lahaj tregoi se përmes këtij festivali janë ndihmuar studentët e këndimit të shkojnë në masterklasa dhe në audicione. “Ajo që mua më gëzon shumë është që kjo lloj energjie, ky lloj obligimi im dhe pasion i imi për të prurë njerëzit e skenës ndërkombëtare në Kosovë, ndihet edhe prej kolegëve që vijnë këtu. Kjo ka qenë shumë e rëndësishme sepse aktiviteti jonë nuk është vetëm për të bërë një show më shumë, fillojmë një rrugëtim të ri që është muzika operistike, po besoj që kemi qenë me fat për mbështetjen që kemi gjetur prej të gjitha institucioneve për të më ndihmuar për ta çuar këtë ëndërr të madhe përpara. Kemi ndihmuar disa studentë të këndimit që të shkojnë në masterklasa të ndryshme, e po ashtu edhe në audicione. Ideja e festivalit është për të promovuar çdogjë që ka të bëjë me kulturën, nuk do të thotë të jetë vetëm opera. Kam parë shumë vepra të bukura në Kosovë, por mundësia për t’u ekspozuar nuk është aq e madhe”, tha Lahaj. Në këtë konferencë të organizuar nga RLIOF, ishte të pranishëm edhe kryetari i Prishtinës, Përparim Rama, i cili u shpreh se janë me fat që e kanë mikun Ramë Lahaj, që sipas tij jo vetëm që na bën nder nëpër krejt vendet e botës, po e sjell atë nder edhe këtu në kryeqytet, duke e krijuar dhe transformuar kryeqytetin në një vend të artit dhe kulturës. “Një numër i madh i workshopave që është i organizuar gjatë këtyre ditëve, ju mundëson të rinjve tanë, pra talentëve të rinjë që të kenë ndërlidhshmëri me njerëz të mëdhenj, me talentët e mëdhenj botëror, të kenë mundësi që të mësojnë nga ta. Kështu krijohet një platformë që në të ardhmen e afërt të kemi edhe një numër të madh të Ramë Lahajve të tjerë, të cilët na prezantojnë fuqishëm nëpër vende e tjera botërore… Po ndihem krenar që si nikoqir, si institucion që e reprezentoj, si kryetar i kryeqytetit dhe nikoqir i këtij festivali, ky vetëm se e ka ngritë Prishtinën në nivel botëror”, tha Rama. Menaxheri nga Filarmonia e Kosovës, Dardan Selimaj është shprehur se për Filarmoninë është nder dhe privilegj që i është bashkuar një projekti kaq të rëndësishëm për skenën e Prishtinës. “Për filarmoninë dhe muzikantë e filarmonisë ka qenë jashtëzakonisht e rëndësishme me pas fatin me punu tre vjet radhazi me mjeshtër të rëndësishëm muzikës lirike dhe artit operistik. E këtë vit veçanërisht, ka qenë privilegj me prit në mesin tonë mjeshtrin Morandi… Në këto tre vjet ka qenë ka qenë jashtëzakonisht e rëndësishme me pas një bashkëpunim dhe unë shpresoj që ka me vazhdu, e që në një të ardhme të afërt me pas mundësi që këtë orkestër me zëvendësu orkestra e operës se Kosovës, për të cilën jemi duke punuar jashtëzakonisht shumë”, tha Selimaj. Të pranishëm në këtë konferencë ishin edhe dirigjent Pier Giorgo Morandi, tenor Alessandro Safina, bariton Massimo Cavallei, soprano Yulia Suleimanova, kuratore Ovul O. Durmusoglu, dhe mjeshtër vokali Francisco Araiza. Ky i fundi u shpreh se është shumë i lumtur që ndodhet në Kosovë për ta mbështetur Lahajn. Araiza tregoi se ishte duke planifikuar të shkonte në pushime verore, kur tenori Lahaj e kontaktoi dhe e ftoi të merrte pjesë në festivalin e tretë të RLIOF. “Së pari shpreh se jam shumë i lumtur që jam këtu, dhe po mendoja rreth mënyrës se si Rama dhe unë u takuam, dhe ai më tregoi diçka shumë qesharake dje. Ai tha se ai më njohu për shumë vite, por në një farë mënyre duket se u humbëm për një farë kohe. Por, papritmas ai zbuloi se unë isha ende gjallë, kështu që ai më kontaktoi falë mrekullisë së teknologjisë. Ne u takuam personalisht dje, por ne u rivum ne kontakt përmes rrjeteve sociale, ai më shkroi mesazh dhe folëm online dhe pash fytyrën e tij të cilën tashmë e njihja përmes internetit, dhe ai më foli rreth ideve dhe projekteve të tij. Unë e ndjeva se ky djalë do të marrë gjithë mbështetjen, sepse ai e meriton këtë”, u shpreh maestro Araiza. Gala Mbrëmja ‘Ramë Lahaj & Friends’, qw mbahet sonte, nis rrugëtimin e RLIOF nën dirigjimin e Pier Giorgio Morandi, shoqëruar nga Filarmonia e Kosovës. Me temën rreth së cilës është konceptuar edicioni i sivjetmë Opera për Liri, RLIOF synon ta shtjellojë idenë e përfshirjes së artistit operistik si ndërmjetësues për ta promovuar e mbrojtur lirinë, të drejtat e njeriut dhe ato sociale. atsh