Letrat mes Dianës, princeshës së Uellsit dhe ish-prezantuesit britanik, Michael Barrymore për takimet e tyre shumë sensitive tregojnë se telefoni i saj ishte përgjuar nga gazeta britanike “Daily Mirror”, tha Gjykata e Lartë. Më herët, duka e Sussex-it paditi botuesin e gazetës duke e akuzuar se kishte mbledhur informacione të paligjshme, ndërsa në gjyq u tha se nëna e tij ishte një “shënjestër e madhe” për titujt e ”Mirror Group” (MGN). David Sherborne, avokati i Harry, i tha gjykatës se disa aktivitete të supozuara të paligjshme në lidhje me Dianën do të kishin ndikuar gjithashtu tek duka. “Është pjesë e rastit tonë që përgjimi i mesazheve të saj do të kishte përfshirë domosdoshmërisht marrjen e informacionit për princin e ri”, tha Sherborne. Avokati iu referua letrave të shkëmbyera mes Dianës dhe ish-personalitetit televiziv Barrymore. Sherborne lexoi dy letra të Dianës për Barrymore, të cilat i referoheshin takimeve mes çiftit, dhe në njërën prej tyre Diana shprehej “e shkatërruar” kur kishte mësuar se “Daily Mirror” i kishte telefonuar zyrës së saj për të dhe takimet e tyre. Në letër, Diana thoshte se nuk i kishte treguar askujt për takimet, siç dëgjoi gjykata. “Ne themi se është e qartë se “Daily Mirror” ka dëgjuar mesazhet e postës zanore dhe kështu ata e dinin për takimet sekrete dhe shumë të ndjeshme midis princeshë Dianës dhe Barrymore”, tha Sherborne. Avokati shtoi se Barrymore ishte “duke luftuar” në atë kohë sepse ishte bërë publike se ai ishte homoseksual, ai ishte në procesin e një divorci të ashpër dhe po trajtohej për varësinë ndaj alkoolit dhe drogës. Sherborne tha se ish-redaktori i “Mirror”, Piers Morgan iu referua dëgjimit të thashethemeve për takimet midis Dianës dhe Barrymore në librin e tij “The Insider”. Avokati tha se arsyeja pse Morgan kishte dëgjuar ishte sepse gazetarët e “Mirror” kishin dëgjuar mesazhe private. Ai tha gjithashtu se një letër drejtuar Barrymore nga Diana në qershor 1997, vetëm dy muaj para vdekjes së saj, “demonstron ndikimin e këtyre aktiviteteve”. Sherborne tha se Diana i shkroi Barrymore, duke thënë se ajo nuk kishte dëgjuar nga ai dhe shpresonte se heshtja e tij të ishte një lajm i mirë. “Barrymore është aq i frikësuar sa nuk kontaktonte më me princeshë Dianën dhe ky është izolimi që shkakton kjo marrëdhënie”, tha avokati. atsh
- Advertisment -