Salla “modelarium” e Fakultetit të Arkitekturës në Prishtinë, u shndërrua në galeri arti për ekspozitën e titulluar “Më shumë për Mitrovicën”. Ekspozita është organizuar nga Fakulteti i Arkitekturës (UP) dhe 7Arte. Në këtë ekspozitë, u prezantuan punimet e studentëve dhe hulumtuesve që kanë eksploruar potencialin e pasurive kulturore dhe arkitekturore të qytetit të Mitrovicës, si dhe rrëfime të ish punëtorëve të Trepçës. Ekspozita prezanton një panoramë të ndërtesave historike në qendër të Mitrovicës, duke rikthyer vëmendjen në këto pasuri të rëndësishme kulturore dhe arkitekturore, por njëkohësisht edhe vizionim të trashëgimisë industriale të Trepçës. Studentët dhe hulumtuesit prezantuan ide për ripërdorimin e këtyre pasurive, duke e bërë atë një burim frymëzimi për të gjithë qytetarët e Mitrovicës dhe të gjithë ata që janë të interesuar për trashëgiminë kulturore dhe arkitekturore. Ekspozita do të jetë një mundësi e shkëlqyer për të njohur më shumë rreth trashëgimisë industriale të Trepçës dhe ndërtesave historike të Mitrovicës. Shoqata 7 Arte ishte zbatuesja e këtij projekti të mbështetur nga Zyra Zvicerane për Bashkëpunim në Kosovë. ATSH
- Advertisment -