Rusia ka nisur sërish sulme me raketa në shkallë të gjerë në Ukrainë, sipas zyrtarëve ukrainas. Alarmet ajrore u dëgjuan në të gjithë vendin mëngjesin e sotëm. Këshilltari i zyrës presidenciale, Mykhailo Podolyak shkroi në Twitter për më shumë se 120 raketa që u gjuajtën në Ukrainë “për të shkatërruar infrastrukturën kritike dhe për të vrarë civilë në masë”. Disa shpërthime të mëdha janë dëgjuar në qendër të kryeqytetit Kiev. Kryebashkiaku Vitali Klitschko foli për disa shpërthime, pa dhënë detaje. Ai paralajmëroi për ndërprerje të mundshme të energjisë dhe u bëri thirrje njerëzve të karikojnë telefonat e tyre celularë dhe të rezervojnë furnizimet me ujë. Autoritetet raportuan gjithashtu sulme në disa pjesë të Ukrainës jugore dhe perëndimore. Shpërthime u raportuan në zona përfshirë Poltava, Odessa, Kharkiv, Mykolaiv dhe Lviv. Mbrojtja ajrore e Ukrainës ishte aktivizuar për të kundërshtuar raketat. Rusia ka sulmuar intensivisht energjinë dhe infrastrukturën tjetër të Ukrainës çdo disa ditë që nga tetori. Të mërkurën, duke përfshirë orët e vona të mbrëmjes, Ukraina përjetoi sulme të shumta raketore në jug dhe lindje të vendit. Më shumë se 700 elementë të infrastrukturës kritike janë shkatërruar në Ukrainë që nga fillimi i luftës ruse në fund të shkurtit, sipas Kievit, me mijëra objekte të tjera të dëmtuara. ATA
- Advertisment -