Rritet tregu i sigurimeve, AMF: 15 milion dollarë më shumë se 2021

Tregu i sigurimeve në Shqipëri ka shënuar rritje mbresëlënëse. Të dhënat e Autoritetit të Mbikqyrjes Financiare bëjnë të ditur se arkëtimet rezultojnë në total thuajse 15 milionë dollarë më shumë se një vit më parë. Gjithnjë sipas këtij autoriteti të ardhurat nga primet e shkruara bruto të sigurimit për periudhën janar-shtator 2022 kapën vlerën 15,5 miliardë lekë, afërisht 155 milionë dollarë, ose 9.46% më shumë se në janar-shtator 2021. Gjatë periudhës janar-shtator 2022, numri i kontratave të sigurimit të lidhura arriti në 981,393 me një rritje prej 15.49% krahasuar me të njëjtën periudhë të një viti më parë. Tregu mbetet i orientuar tek sigurimet e Jo-Jetës, të cilat sollën 91.83% të vëllimit të përgjithshëm të primeve, ndërsa sigurimet e Jetës kanë 8.08%. Ndërkohë dëmet e paguara nga komppanite kanë shënuar rënie. Gjatë periudhës janar-shtator 2022, dëmet e paguara bruto në tregun e sigurimeve, arritën në rreth 4,7 miliardë lekë, ose 7.70% më pak se në periudhën janar-shtator 2021. Dëmet e paguara bruto në sigurimin motorik për periudhën janar-shtator 2022 kapën vlerën e 3,2 miliardë lekëve, duke pësuar një rritje me rreth 8.45% krahasuar me të njëjtën periudhë të një viti më parë.https://lajme.rtsh.al/artikull/rritet-tregu-i-sigurimeve-amf-15-milion-dollare-me-shume-se-2021