Kosova do të aplikojë për anëtarësim në BE brenda këtij viti

Kryeministri Albin Kurti gjatë një takimi sot me presidenten e Komisionit Evropian, Ursula von der Leyen ka njoftuar këtë të fundit për avancimin e vazhdueshëm që Kosova po shënon në indikatorët ekonomikë dhe demokratikë, punën në drejtësi dhe luftimin e krimi dhe korrupsionit. Kurti veçoi të gjeturat e raportet ndërkombëtare që dëshmojnë për përparimin gradual por të vazhdueshëm të Republikës së Kosovës në shumë fusha. Duke përfshirë këtu Raportin e Vendit për vitin 2022, që ishte ndër më të mirët në rajon, dhe tash së fundmi raportin e Projektit të Drejtësisë Botërore (WJP) i cili përveçse rendit Kosovën si të parën në rajon për nga sundimi i ligjit, e rendit atë në vendin e dytë në botë si shteti me përmirësimin më të madh në këtë fushë. Sa i përket rrugës drejt Bashkimit Evropian, kryeministri Kurti tha se Kosova do të aplikojë për anëtarësim në BE para përfundimit të këtij viti. Ndërkaq sa i përket liberalizimit të vizave, kryeministri Kurti u shpreh se Kosova ka plotësuar të gjitha kriteret dhe se liberalizimi tashmë është më se meritor për qytetarët e saj. Në takim u diskutua edhe për krizën energjetike me të cilën po përballet i gjithë kontinenti evropian. Bashkimi Evropian ka qenë partner i vazhdueshëm i shtetit të Kosovës. Në këtë takim të sotëm, u konfirmua ndihma e menjëhershme buxhetore prej 75 milionë euro për Kosovën në ballafaqimin me krizën energjetike. Në emër të Qeverisë dhe popullit të Kosovës, kryeministri Kurti shprehu falënderimin e tij për këtë mbështetje e cila do të ndihmojë drejtpërdrejt në minimizimin e efekteve të krizës energjetike te qytetarët tanë. Pas takimit, Kurti dhe Ursula von der Leyen vizituan së bashku objektin e Fakultetit të Arkitekturës, i cili falë financimit të Bashkimit Evropian, tani ka një sistem të ri të ngrohjes qendrore.https://ata.gov.al/2022/10/27/kurti-kosova-do-te-aplikoje-per-anetaresim-ne-be-brenda-ketij-viti/