Një paketë investimesh infrastrukturore prej 62 milionë lekësh po zbatohet aktualisht në fshatin Ngjeqar të bashkisë Roskovec, si përgjigje ndaj kërkesave dhjetëravjeçare të banorëve. Në një prononcim për Agjencinë Telegrafike Shqiptare, kryetarja e bashkisë së Roskovecit, Majlinda Bufi u shpreh se këto ndërhyrje të rëndësishme janë kërkuar nga bashkia dhe po kryhen me mbështetjen e Agjencisë së Mbrojtjes Civile dhe Ministrisë së Mbrojtjes. “Investimi trajton dhe zgjidh në fakt 6 nënobjekte me ndërhyrje emergjente në fshatin Ngjeqar, njësia Kurjan, bashkia Roskovec”, tha ajo. Bufi informoi se bëhet fjalë për punime në rrugën e lagjes Pocestë-Allambrez, si dhe punime mbrojtëse në përroin e Allambrezit. Po ashtu, në kuadër të këtyre investimeve parashikohet ndërtimi i urës në përroin e Leshllit, si dhe punime në rrugën e lagjes “Kurtaj”. Kryetarja e bashkisë së Roskovecit informoi se ndërhyrje do të kryhen edhe për përmirësimin e shkarjes në lagjes “Stan” dhe në lagjen “Gogaj”. “Këto janë ndërhyrje të rëndësishme për banorët e zonës, si një përgjigje për kërkesat dhjetëravjeçare të tyre. Afati për kryerjen e këtyre punimeve është 3 muaj”, tha ajo. https://ata.gov.al/2022/10/27/roskovec-nderhyrje-emergjente-ne-infrastrukture/
- Advertisment -