Vllaznia e femrave humbet 0-2 ndaj Real Madrid

Skuadra e Vllaznisë së femrave humbi sot 0-2 në “Loro Boriçi” të Shkodrës përballë skuadrës së femrave të Realit të Madridit në sfidën e parë të fazës së grupeve të Ligës së Kampioneve për femra. Skuadra e Vllaznisë tregoi në këtë sfidë se pavarësisht humbjes mund të përballet me skuadrat më të mira të Evropës. Pas një pjese të parë në baraspeshë, ku të dyja skuadrat kërkuan golin, ishte pjesa e dytë ajo që foli më shumë për spanjollet. Golin e parë të ndeshjes e shënoi Esther Gonzalez në minutën e 54-të të ndeshjes falë një depërtimi në zonë duke kaluar mbrojtësen Maliqi dhe portieren Williams-Mosier. Në minutën e 76-të Real Madrid shënoi golin e dytë me 11 metërsh, të cilin e fitoi Olga Carmona pas një pengimi në hyrje të zonës, dhe e shënoi po vetë ajo nga pika e bardhë e penalltisë. Pavarësisht rezultatit të sotëm kjo ishte një arritje historike e vajzave kuq e blu që u kualifikuan për herë të parë mes 16 skuadrave më të mira të kontinentit me shortin që i ka vënë përballë emrave më të mëdhenj të futbollit të vajzave në Grupi A siç janë Real Madrid, Paris Saint Germain dhe Chelsea.http://ata.gov.al/2022/10/20/liga-e-kampioneve-vllaznia-e-femrave-humbet-0-2-ndaj-real-madrid/