Abdyl Frashëri, veprimtari i Rilindjes Kombëtare

Më 11 tetor 1892, ndërroi jetë Abdyl Frashëri, atdhetar dhe ideolog i Rilindjes Kombëtare. Emrin e vërtetë e pati Abdullah Hysni, i biri i Halid beut. Ishte një nga personalitetet më të rëndësishme të Rilindjes Kombëtare. Në Parlamentin e parë osman të vitit 1877 hyri si deputet i Janinës, u zgjodh kryetar i Komitetit të Janinës dhe në dhjetor të po këtij viti, u zgjodh kryetar i Komitetit të Stambollit, që u formua për të mbrojtur të drejtat e shqiptarëve në Perandorinë Osmane. Frashëri ishte një nga aktivistët kryesorë të Kuvendit të Prizrenit të krijuar për të mbrojtur trevat shqiptare, si pasojë e firmosjes së Traktatit të Shën Stefanit (1878). Mbrojti idenë e bashkimit të trevave shqiptare në një vilajet, në kuadër të Perandorisë Osmane. Gjatë Kongresit të Berlinit, në emër të Lidhjes, së bashku me Mehmet Ali Vrionin, kreu takime me përfaqësues të Fuqive të Mëdha për të mbrojtur të drejtat e shqiptarëve. Në qeverinë e drejtuar nga Ymer Prizreni (1881), Abdyl Frashëri mori përgjegjësinë e ministrit të Punëve të Jashtme. Në prill të këtij viti u arrestua. Në gjyqin që u bë në Prizren u dënua me vdekje, por më pas ky vendim u kthye në burgim të përjetshëm. Pasi kreu tre vjet dënim në burgun e kalasë së Prizrenit, u dërgua me qëndrim të detyruar në Ballëkesir dhe në Bandërma. Në vitin 1886 lirohet me kushtin që të mos merrej me politikë dhe u caktua anëtar i këshillit të qytetit të Stambollit. Drejtoria e Përgjithshme e Arkivave sjell foton e Abdyl Frashërit, realizuar në studion e vëllezërve Romaidhi, fotografë të njohur, në Athinë. Ndërsa fotot e tjera janë nga vendimi i Këshillit të Ministrave i vitit 1978, për kthimin e eshtrave të atdhetarit në vendin e origjinës, me rastin e 100-vjetorit të Lidhjes së Prizrenit.https://ata.gov.al/2022/10/11/perkujtohet-abdyl-frasheri-veprimtari-i-rilindjes-kombetare/