Ramë Lahaj këndon shqip në Elbphilarmonie të Hamburgut

Tenori shqiptar me famë botërore, Ramë Lahaj, ka realizuar një tjetër koncert të suksesshëm që siç thotë ai, mund të quhet edhe një ëndërr e bërë realitet. Ramë Lahaj ka kënduar në Elbphilarmonie të Hamburgut, këngën shkodrane “Bishtalecat palë-palë”, e cila është mirëpritur nga publiku. “Kënga shqipe u mirëprit e u duartrokit fuqishëm në Elbphilharmonie, një nga sallat koncertale më prestigjioze në botë. Të gjitha i kemi, veç dinjitetit me u mobilizu një herë e mirë, për me ja tregu botës anën tonë të mrekullueshme”, shkruan Ramë Lahaj në rrjetet sociale, ndërkohë që videoja e hedhur prej tij është bërë virale. Koncerti në Elbphilarmonie të Hamburgut ishte së bashku me të madhin Placido Domingo, sopranon Micaela Oeste dhe dirigjentin e Kameratës së Hamburgut, Eugene Kohn. Placido Domingo, një nga emblemat e muzikës operistike botërore, vazhdon të këndojë edhe pse i ka kaluar të 80-at, duke ndihmuar edhe në promovimin e yjeve të reja të skenës. Ky ishte vetëm njëri nga koncertet që Lahaj dhe Domingo kanë interpretuar së bashku. Të dy tenorët morën duartrokitje të gjata dhe ovacione nga publiku i Hamburgut.http://ata.gov.al/2022/10/06/rame-lahaj-kendon-shqip-ne-elbphilarmonie-te-hamburgut/