BE mbështet akademinë për rritjen e bimëve mjekësore

“Immortelle” është një biznes i ri familjar në Shqipëri i themeluar nga 26-vjeçarja Migena Xheleku, ku spikat përkushtimi për të prezantuar një model kultivimi të bimëve mjekësore që garanton certifikimet e nevojshme dhe që nuk sjell zhdukjen e këtyre bimëve. Përzgjedhja si një prej fituesve të “Challengefund”, pjesë e programit të BE-së për Inovacionin që zbatohet në bashkëpunim me qeverinë shqiptare, mundësoi krijimin e një akademie për rritjen e bimëve mjekësore, ku fermerët për herë të parë do të mësojnë njohuri teorike dhe praktike në ambientet e fermës, që garantojnë prodhim sipas standardeve më të mira dhe eksport të sigurtë. Migena tregon se pasioni për bimët mjekësore e shtyu atë të gjente mënyra për t’i kultivuar ato në tokat e familjes së saj. Angazhimi në këtë sipërmarrje dhe lëvizjet me familjen, e kanë bërë Migenën që të njihet me shumë fermerë që merren me kultivimin e bimëve mjekësore aromatizuese në Shqipëri dhe jashtë vendit. “Njëra nga kulturat e bimëve mjekësore që unë kam sjell në fshatin tim në Stërmas, është “Immortelle”, mjaft e kërkuar nga tregu”, thotë Migena, teksa vlerëson se krijimi akademisë për rritjen e bimëve mjekësore, është një mundësi e mirë që u vjen në ndihmë fermerëve të këtij sektori, për të mësuar çdo hap në këtë sipërmarrje, që nga mbjellja e deri në tregtimin e tyre. “Përmes kësaj akademie, fermerët do të kenë mundësi të mësojnë se çfarë duhet të kultivojnë në tokat e tyre, që të jetë me vlerë”, tha ajo. Sektori i bimëve mjekësore është një nga shtyllat e ekonomisë së Shqipërisë dhe ky sektor vijon të jetë në rritje të vazhdueshme vitet e fundit duke pasur parasysh kërkesën e lartë në tregun ndërkombëtar. Të ardhurat që gjenerohen nga ky sektor, përfshirë edhe angazhimin në punë të të rinjve në zonat rurale janë të konsiderueshme.https://ata.gov.al/2022/10/03/be-mbeshtet-akademine-per-rritjen-e-bimeve-mjekesore/